Tim地带

大话西游,讲紧既係周星驰经典电影之一,大话西游之月光宝盒以及大话西游之仙履奇缘.

我自己黎讲,第一次睇呢两套(或一套)电影既时候,感觉上係颇为不知所云.因此亦并未好认真去睇.后来因为有一段时间实在太过无聊,所以好认真地睇左一次.结果发现原来呢套片真係好搞笑,好多经典语录.原来一套片可以俾你笑足八十几分钟,然后可以令到你觉得感动既.

但当我最近再度回味既时候,除左搞笑,除左感动,更加多左既係一份无奈.

至尊宝,一个无所事事,生活自由既山贼.喺好多人既眼中,佢可能係一个冇厘文化,一事无成,冇人生目标既无业游民.但佢虽然终日游手好闲,却生活得好自在,冇咩野需要去担忧.

出现左白晶晶,佢开始出现左属于佢自己的追求目标.然后,牛魔王出现.佢冇任何选择.佢只有改变现状,係被逼地,被动地需要改变现状.从佢决定用月光宝盒时光倒流果一刻,佢已经注定冇可能再好似以前咁无所事事,无忧无虑,自由自在地生活.

星爷呢个角色,唔单只係至尊宝,更加唔净只係孙悟空,呢个角色,更加係每一个平常人.

大部分人细个既时候,佢地都可以享受到无忧无虑,自由自在既生活.虽然而家既学生学习负担越来越重,但学习係佢地唯一需要负担既野,佢地唔需要太多去考虑以后既目标.可能读下书,拍下拖仔,已经係佢地生活既一切.

但呢一切唔会係人生既全部,总有一日你会被逼改变现状.

命运有时就係弄人,你想倒流时光救人咩?俾人倒流足500年.而人生又係充满变数,可能係负面既东西,同样亦可能係惊喜.至尊宝从来冇谂过会遇到紫霞,当佢遇到紫霞既时候,更加从来冇谂过后来会爱上左紫霞.

罗家英既唐僧,一个好多人觉得好烦既人.喺至尊宝从无忧无虑,无所事事变成一个充满责任既人既过程当中,佢起到既作用好大.当至尊宝仍然喺个"成长过程"既时候,佢好憎唐僧,因为佢好烦.佢讲咩野,至尊宝都听唔入耳.但唐僧似乎冇怪过至尊宝,只係一直继续从旁提点至尊宝.

而大家成长过程中,是否隐隐约约见到有唐僧呢个人物呢?喺你既成长过程中,佢地不断去提点你,你可能会嫌佢地烦,但佢地就不厌其烦地提点你.呢d"烦人"可能係你既父母,你既长辈,亦可能係一d比你有经验既朋友.到左一天葡萄成熟透既时候,你终于发现,原来佢地讲既野係有佢地既道理,然后,你终于开始思考佢地讲既东西.

至尊宝亦喺到生命结束果一刻,佢睇清楚自己既心.佢睇到原来喺佢心底最分量最重既人唔係白晶晶,而係紫霞.同时得到感悟既佢亦终于成熟了.佢明白左唐僧既说话,佢必须再次承担起佢既责任.
不过此时又要讲到一个课题,就係"无奈".因为呢个时候,佢要承担佢既责任,承担从至尊宝蜕变成孙悟空既责任,承担起救唐僧既责任,同时亦承担起,对紫霞,对自己既责任,佢冇得选择,佢一定要负起责任,而要负起责任就要放弃好多事情,呢个就係无奈之处.

佢要负起佢既责任,所以佢要放弃紫霞.又係一个无奈.尤其是当佢捉紧受伤紫霞既手, 佢头上既紧箍咒收紧既时候,佢头痛心更痛.佢同紫霞既相遇係缘分,然而,佢地根本係两个世界既人.因为客观既原因,佢地冇可能喺埋一齐.

救出唐僧后,佢发现唐僧讲野异常简洁.呢个可能只係电影既一个笑位.但亦可能係,唐僧讲野风格从来冇变过,变既可能只係至尊宝(又或者孙悟空).

当转世既紫霞同夕阳武士企喺城门既时候,相信孙悟空当时係带住无奈,怀恋既心情回望,夕阳武士就好似係佢既过去.佢去帮夕阳武士珍惜左现在.然后,夕阳武士又好似佢而家自己既心,用个心睇番自己,喺现实既生活无奈地奔波,就好似只狗咁.睇到孙悟空走既背影,配上背景音乐,令人再一次感到无奈之情,一种好贴近自己生活,甚至自己都感受过无数次既无奈.

人生本来就係充满左无限咁多个无奈.细个既时候,个个都唔想番学,你一定要番,无奈;长大出黎社会,要面对更大既工作压力,要对自己对家庭承担更多既责任,无奈;感情遇到钟意既人,但又唔可以一齐,无奈;见到身边既事物一日一日变化,身边既人离开,无奈;到老果阵,见到自己身体一日差过一日,无奈.每个人都有太多太多无奈了.

一生人几乎每一日都做紧一d你唔想做既野,但你又必须去做,无奈;你唔中意你生活既环境,但你必须要适应佢,无奈;你遇到许许多多既困难,必须靠自己克服佢,无奈.然而,呢个就係人生. 

大话西游唔单止係一套喜剧,一套科幻片,一套爱情片,更加係一个普通人既人生既缩影.从小时候无忧无虑,自由自在既至尊宝,到长大成人,无奈背负着更多责任,压力,不再自由既孙悟空,从小时候喜欢边个就追既学生仔至尊宝,到成为一个成人之后连钟意人都已经充满左不同既客观因素既孙悟空.

呢套电影喺笑声中映射到好多无奈,因为至尊宝到孙悟空既故事本身就係一个极大既无奈,方方面面. 但係人生便是如此,不在无奈中爆发,就在无奈中灭亡.至尊宝最终选择左爆发,佢承担起果d迟早都係属于佢既责任,虽然不得不舍弃好多野,但呢个亦係佢,同每一个人人生都必经既阶段,最终佢成为左孙悟空.

想当天可以孩子气,今天争争气,男子组靠你.